Mergullarse na extracción de navalla, visualizar o marisqueo a pé no intermareal areoso ou a recollida de percebes na costa rochosa agora é posible gracias aos vídeos 360º elaborados pola Consellería do Mar sobre os oficios do mar . Completan a serie de sete vídeos a pesca de polbo con nasas, a pesca de palangre, a pesca de cerco e o cultivo de mexillón en batea. Podes atopalos no canal youtube da marca pescadeRías, ¿de onde se non?.

O 29 de marzo realizouse o sorteo de dous vales de 30€ en peixe e marisco fresco, para ser utilizado nunha peixería adherida, entre aquelas persoas que descargaran a APP de pescadeRías, ¿de onde se non? e seguiran as instrucións indicadas na nosa páxina de facebook ou en instagram. Os afortunados foron Alejandro Juanatey e Jm Sanjorge. Parabéns!!

Recordámosvos que a aplicación pódese descargar desde Google Play para dispositivos Android e en breve estará dispoñible para dispositivos IOS.

Do 8 ao 11 de abril celébrase a 33 Edición do Salón de Gourmets en Madrid. A Consellería do Mar estará presente cun stand con 22 empresas coexpositoras e contará cun Espazo de catas onde terán presenza os produtos certificados pola marca pescadeRías, ¿de onde se non?. Premendo aquí podes consultar o programa de catas aquí descargar unha invitación. Nesta edición asistirán 11 empresas certificadas: PORTO-MUIÑOS, Conservera Gallega, Conservas Portomar, Mariscos Daporta, Currimar Conservas Tradicionais, Pulponor S. Coop. Galega, Conservas y Ahumados Luso Galaicos, Mariscos Camino SL , Frinsa, Conservas La Brújula e Yatecomeré.

Os próximos 06 e 07 de Abril terá lugar unha nova edición das xornadas Do Mar ao Prato no peirao de Arcade, organizadas pola Confraría de Pescadores Virxe do Carme, coa colaboración de Mariscos Inés, ambas entidades certificadas polo selo pescadeRías, ¿de onde se non?, e do concello de Soutomaior.

Realizaranse degustacións das principais especies que se comercializan na lonxa como ameixas, chocos ou anguías. O programa complétase coa exposición fotográfica Xoias do mar e con actuacións musicais.

A 20 edición do Fórum Gastronómico celebrouse en A Coruña do 10 ao 12 de marzo. O selo pescadeRías. ¿de onde se non? estivo presente no stand da Consellería do Mar xunto coas empresas certificadas Pulponor Sociedade Cooperativa Galega, Mares de Galicia SA, Conservas y Ahumados Luso Galaicos SL e Currimar Conservas Tradicionais. Novás y Mar Especialidades, SL e Porto-Muiños acudiron cun stand propio.

Aquí podes ver un resumo das imaxes do evento.

A Federación de Prazas de Abastos de Galicia (FREPAGAL) súmase ás vendas na internet a través dunha plataforma, impulsada pola Xunta de Galicia, que permite comprar produtos a diferentes praceiros/as, preparados e embalados, que poden ser enviados a calquera punto da Península, en transporte refrixerado, en menos de 24 horas. Premendo aquí podes acceder ao vídeo promocional desta iniciativa.

Para facer as túas compras entra en plazasabastosgalicia.com.

A campaña marisqueira en Noia pechou o 28 de marzo coa extracción de 2,3 millóns de kilos de moluscos bivalvos e unha facturación de 18 millóns de euros. Os máis de 1500 mariscadores, entre a pé e a flote, volverán a faenar no mes de setembro. Tamén finalizou a campaña da volandeira na Ría de Arousa ata o mes de novembro e a captura de lumbrigante ata o 1 de xullo. Por outra banda, o 1 de abril comezou o marisqueo a flote nas autorizacións da Confraría de Muros e o marisqueo a pé nas zonas de libre marisqueo xestionadas polas confrarías de Noia e Muros.

O Intecmar organizou o 03 de abril en Vilagarcía, o seminario do proxecto europeo Alertox-Net no que participan 5 países.  O proxecto, financiado polo Fondo Europeo de Desenvolvemento  Rexional Interreg Atlantic Area, ten como obxectivo principal facilitar a distribución no mercado de produtos alimentarios mariños máis seguros, deseñando para iso sistemas de alerta de toxicidade innovadores. O seminario estivo dirixido ao sector produtivo, ás administracións  e aos centros académicos ou de investigación.

Entre o 2 e o 4 de abril a facultade de Xeografía da Universidade de Santiago de Compostela acolleu a XXIV Conferencia da Asociación Europea de Economistas da Pesca (EAFE) que organizou o grupo de investigación EcoPesca da Universidade de Santiago de Compostela baixo o título Buscando el azul: la economía de la pesca y la acuicultura postmilenaria. O día 05 houbo unha sesión adicada a experiencias locais de Galicia na que se falou da marca pescadeRías. ¿de onde se non?, da extracción do berberecho por parte da Confraría de Pescadores de Noia e da ecoetiqueta Pescaenverde.

A primeira aceleradora galega do sector alimentario, Business Factory Food, comeza a súa andadura. Impulsada pola Xunta de Galicia e dinamizada polo Clúster Alimentario de Galicia e empresas de referencia na industria alimentaria, busca atraer e impulsar proxectos innovadores que aporten solucións innovadoras ao mercado, afianzar o tecido empresarial e industrial do sector galego e atraer talento nacional e internacional. Está aberta a fase de convocatoria ata o 16 de maio. Podes consultar as bases de participación premendo aquí.

Ao longo do mes de marzo, adheríronse ao selo pescadeRías, ¿de onde se non? oito establecementos: Na cidade de Ferrol Peixería Esteiro, Pescados Roque, Pescados Pedro y Susana (Mercado de Recimil), Pescadería Yoli y Paco (Mercado de Recimil) e a Peixería José (Mercado de A Magdalena); no Mercado da Praza de Lugo, en A Coruña, Pescados y Mariscos Rabina; en A Pobra do Caramiñal Pescados Paz; e na Praza de Abastos de Bueu, Pescados Torres. Benvidos!

Durante o pasado mes, foron seis os novos restaurantes adheridos á marca pescadeRías, ¿de onde se non?. Tres na cidade de Ferrol: O Camiño do Inglés, Josefa´s Bar e A Barcia; na mesma comarca, na localidade de Narón, o Restaurante Anacos; en Cedeira A Taberna de Jojó; e en A Guarda, o restaurante Casa Chupaovos.

Grazas a todos pola vosa aposta polos produtos da pesca artesanal.

En marzo sumamos un novo axente certificado: a depuradora Moluscos Rías Gallegas, S.A. (bivalvos). Tamén durante este mes, a Lonxa de Cedeira, ampliou o alcance da súa certificación a cefalópodos. Por outra banda, pasaron auditorías de seguemento as empresas Frigoríficos Rosa de los Vientos, S.L., DEMARSUSA, Mariscos Cordal, S.L., Mariscos Comesaña, S.L., Conservera Gallega, S.A. e Conservas La Brújula, S.L.; así como as Lonxas de Baiona e a de Baixura do Porto de Vigo.

Ata o 12 de abril está aberta a convocatoria de axudas do Programa Pleamar 2019 da Fundación Biodiversidad. O programa pretende impulsar proxectos orientados á protección e recuperación da biodiversidade mariña; á redución e xestión de residuos, á mellora da xestión das Áreas Mariñas Protexidas de España e ao reforzo da colaboración entre a comunidade científica e o sector pesqueiro e acuícola, entre outros. Preme aquí para obter máis información.

En marzo, impartimos formación en Hixiene Alimentaria e Manipulación de Alimentos a todo o persoal da Lonxa de Ferrol, como requisito previo á súa certificación no selo pescadeRías, ¿de onde se non?, e ao da empresa Mariscos Comesaña.

Por outra banda, minoristas de Ferrol, así como restaurantes do entorno de Cedeira participaron en sendas charlas sobre a marca pescadeRías, ¿de onde se non? e os requisitos para adherirse á mesma.

Daniel López, chef do restaurante O Camiño do Inglés, recoñecido cunha Estrela Michelín e adherido o pasado mes ao selo pescadeRías, ¿de onde se non?, elabora a súa carta con produtos de mercado onde peixes e mariscos son protagonistas da meirande parte dos pratos. A súa proposta de preparación do xurelo con crema de apio e pesto de leituga de mar, ademais de saborosa, aporta todos os beneficios nutricionais do peixe azul e das algas. Preme aquí para ver a receita.