Entre os días 3 e 7 de novembro, celebrouse en Ourense o Salón Internacional de Turismo Gastronómico, XANTAR 2021.

O xoves 4, os produtos pescadeRías estiveron presentes en dúas demostracións de cociña en directo a cargo da cociñeira Maica Couto e Diego Domínguez (A Ostrería, Santiago de Compostela) baixo o lema “A Despensa da pesca artesanal” con preparacións con ourizo e choco como protagonistas e “Suculento tesouro atlántico” na que se utilizaron navallas de Fisterra e xurelo. O venres 5, Alejandro Iglesias (Restaurante Cabanas, Lalín) estivo a cargo da mostra de cociña “pescadeRías, de proximidade e con selo propio” onde os productos da pesca artesanal utilizados para a elaboración dos pratos foron volandeira e robaliza.

Preme aquí para ver un vídeo.

Do 18 ao 21 de outubro celebrouse a 34 Edición do Salón Gourmets no Recinto Feiral de IFEMA en Madrid. A Consellería do Mar estivo presente no Stand institucional da Xunta de Galicia, así como as empresas certificadas coexpositoras Currimar Conservas Traicionais, Conservas La Brújula S.L., Conservas Portomar S.L.U., Conservera Gallega S.A., Mares de Galicia, S.A., Mariscos Daporta S.L. e Porto-Muiños S.L. O evento contou cun amplo programa de actividades no Espazo Degustación onde a marca pescadeRías, ¿de onde se non? estivo presente en 4 mostras de cociña en directo dando a coñecer a pesca artesanal, os oficios do mar e os produtos certificados. Premendo aquí podes ver un vídeo.

O pasado 28 de outubro celebrouse a VI Edición das Xornadas de Exaltación do Berberecho de Noia impulsadas pola Confraría San Bartolomé de Noia. O cociñeiro invitado este ano foi Javier Olleros (Restaurante Culler de Pau), que coñeceu os bancos de marisqueo a flote, a clasificación de produto e a depuradora e realizou un showcooking na Sociedade Liceo de Noia na que amosou en diferentes preparacións a potencialidade deste suculento bivalvo. O día 31, no marco da IV Edición de Mares da Fin do Mundo, mostra internacional de cinema documental en Outes, tivo lugar unha degustación gastronómica de Berberecho de Noia, capitaneada por Miguel Mosteiro (Gastrolab). Preme aquí para ver un vídeo.

Se hai unha especie emblemática da gastronomía galega é o polbo, sendo á feira a preparación típica de Galicia por excelencia.

Este cefalópodo de oito brazos e cabeza grande debaixo da que agocha unha boca formando un pico «de loro» duro do que se vale para comer nécoras, cangrexos…, vive preto da costa e é de hábitos nocturnos. A súa extracción regúlase con plans de xestión anuais que establecen o período de veda. A forma máis utilizada para capturalo é a nasa deseñada especificamente para esta especie.

Preme aquí para saber máis.

O día 2 de novembro comezou a campaña da volandeira na Ría de Arousa. Esta especie non debe ser confundida coa zamburiña, tamén presente na costa galega.

Por outra banda, o día 8 deste mes inciouse a campaña do choco en Redondela. A Confraría de Pescadores San Xoán de Redondela realiza a venda deste cefalópodo baixo a marca Choco de Redondela.

O día 6 de Novembro rematou a veda da centola (Maja brachydactyla) desde a desembocadura do río Miño ata o paralelo que pasa polo cabo Estaca de Bares. Entre este e a desembocadura do río Eo, continúa prohibida a súa extracción ata o día 27 deste mes.

A captura desta especie está regulada polo Plan de xestión da centola e do boi 2021 – 2022.

Durante o mes de outubro impartiuse formación en hixiene e manipulación de alimentos a persoal de nova incorporación da Confraría de Pescadores de Cabo de Cruz así como a persoal da lonxa e da Confraría de Pescadores de Bueu.

Ter actualizada a formación nestas materias é requisito indispensable para a superación das auditorías de recertificación para o selo pescadeRías, ¿de onde se non?.

Mares de Galicia, S.A. é unha empresa familiar con longa tradición no sector adicada á comercialización de mariscos frescos e elaborados, inspirada nas máximas de calidade e bo facer. Está certificada polo selo pescadeRías, ¿de onde se non? para os grupos biolóxicos bivalvos, crustáceos, equinodermos e gasterópodos que comercializan tanto en fresco como en transformado.

Durante a última edición do Salón Gourmets de Madrid presentaron unha nova liña de produtos pasteurizados con salsas elaboradas polo cociñeiro Pepe Solla.

Dende mediados de outubro, podemos atopar no Mercado de Chamartín de Madrid os produtos da pesca comercializados por O Percebeiro, entidade certificada polo selo pescadeRías, ¿de onde se non?. Neste mercado, O Percebeiro conta cun punto de venta directa ao público adherido á marca pescadeRías onde ofrece os mellores peixes e mariscos procedentes da pesca artesanal de Galicia.

O Percebeiro conta así mesmo cunha tenda on line, tamén adherida á marca, dende a que envían a domicilio os produtos máis frescos en menos de 24 horas tras a súa compra nas poxas nas lonxas.

A cetárea de crustáceos e distribuidor de peixe, cefalópodos e bivalvos Salitre realizou a súa auditoría inicial de certificación no mes de outubro, con alcance para crustáceos, bivalvos, cefalópodos e peixe. Así mesmo, tiveron auditorías de recertificación Mariscos Campelo, S.A. (bivalvos, equinodermos e cefalópodos), Armadores de Burela, S.A. (cefalópodos) e a Confraría de Pescadores de Bueu (cefalópodos, bivalvos, peixe, crustáceos, equinodermos e gasterópodos), que a maiores ampliou o seu alcance de certificación ao grupo biolóxico antozoos. A Confraría de Pescadores de Cabo de Cruz (bivalvos) superou unha auditoría de seguemento da marca.

ORDE do 25 de outubro de 2021 pola que se regulan as bases e a convocatoria para o ano 2021 das axudas, en réxime de concorrencia competitiva, pola paralización temporal da actividade de marisqueo a pé como consecuencia do gromo da COVID-19.

Convocatoria de axudas de apoio ao sector pesqueiro para fomentar a recuperación e modernizar o modelo produtivo.

Convocatoria de axudas para armadores de barcos de eslora total igual ou superior a 12 metros, tendo preferencia para as axudas os armadores de barcos de eslora total igual ou superior a 24 metros, para a adquisición por primeira vez, e instalación de Sistemas de Seguemento Electrónico Remoto (REM).

Dende finais da década dos 70, proliferaron en todo o mundo un gran número de ecoetiquetas orixinadas pola demanda do mercado para identificar e diferenciar aqueles produtos que cumpren unha serie de requisitos ambientais. No directorio Ecolabel Index recompílanse máis de 455 ecoetiquetas presentes en 199 países e que abarcan 25 sectores industriais que tratan de trasladar e inducir no consumidor a bondade dos produtos ou procesos co selo de “sostible”.

Ante a avalancha é importante ter uns criterios mínimos que poidan clasificalas e saber a súa representatividade e impacto real. Neste artigo publicado orixinalmente en The Conversation, o catedrático da USC Gumersindo Feijoó ofrécenos unha pequena guía para a súa interpretación. Preme aquí para ver o artigo.

O ourizo é unha especie procedente da nosa pesca artesanal incorporado os últimos anos á nosa gastronomía, na que xa é habitual o seu consumo. O pasado mes de outubro comezou a súa campaña polo que podemos atopalo en fresco, tanto enteiro como a gónada, procedente das nosas costas.

A receita que vos presentamos este mes, Ourizo de mar, xema trufada, Fabas de Lourenzá e algas, foi elaborada polo chef Manuel Mallón de Espazo Remollo (Ames – A Coruña) e presentada na sala de catas da Consellería do Mar na 34 edidión do Salón Gourmets de Madrid, durante a mostra de cociña en directo «Suculento tesouro atlántico».

Se queres aprender a preparala, premendo aquí podes acceder a ela.