A marca pescadeRías nos Premios HGg&T

Revista HG&T  outorgou un premio á marca pescadeRías, ¿de onde se non? na categoría Recuperación de Produto, na gala dos premios HGg&T 25 anos. Recolleu o galardón, Mercedes Rodríguez Moreda, directora xeral de Pesca, Acuicultura e Innovación Tecnolóxica da Consellería do Mar.

Ata o ano 2018, a marca pescadeRías conta con 109 entidades certificadas que engloban lonxas, depuradoras, cetarias, centros de expedición, distribuidores e empresas de transformación e 269 entidades adheridas entre peixerías, restaurantes e tendas online.

Moitas grazas polo recoñecemento!


Canal Rías Baixas

No mes de setembro, o Canal Rías Baixas realizou tres reportaxes que tiveron como protagonista a marca pescadeRías, ¿de onde se non?. Nos vídeos, amósanse os oficios do mar,  a variedade de produtos certificados e a tipoloxía de entidades usuarias e adheridas que engloba a marca, como o marisqueo, a pesca de baixura, a actividade na lonxa, o proceso de depuración e procesos de transformación como a conserva e a conxelación de polbo.

Preme aquí para ver as reportaxes: vídeo 1, vídeo 2, vídeo 3.

Exaltación do Berberecho de Noia

Do 17 ao 20 de outubro, celebraranse as IV Xornadas de Exaltación do Berberecho de Noia cun amplo e variado programa, organizadas pola Confraría de Pescadores de Noia.

Entre outras actividades, haberá unha visita de seis cociñeiros á zona de marisqueo, á lonxa, á depuradora e á praza de abastos, masterclass, showcooking, mesas de debate e degustación popular.

Podes consultar o programa premendo aquí.

Aperturas e peches

En outubro,  iniciouse a campaña do ourizo na provincia de Pontevedra, tal e como contemplan os plans de xestión presentados polas diferentes confrarías de pescadores para este recurso. Así mesmo, na provincia de A Coruña, deu comezo a campaña marisqueira en Aguiño.

Por outra banda, rematou a veda para o Santiaguiño (Scyllarus arctus), que poderá ser capturado ata o remate do ano, e comezou a veda da lagosta (Palinurus elephas), que non atoparemos nas lonxas ata o ano 2020.

Campaña «Vai de peixe»

A Consellería do Mar presentou a campaña Vai de peixe, destinada a impulsar o consumo de produtos do mar e da acuicultura entre os consumidores da franxa de idade entre os 18 e os 35 anos. Xa están dispoñibles unha páxina web, unha canle de youtube e un perfil de instagram desta iniciativa, que pretende fomentar hábitos de alimentación saudable e o consumo habitual de peixes e mariscos entre os «millennials».  Vídeo de presentación.

Mulleres do Mar de Arousa

O Galp Ría de Arousa obtivo o primeiro premio do concurso internacional convocado pola Asociación Internacional de Mujeres en la Industria Pesquera (WSI) grazas ao vídeo The Arousa Sea Women (Mulleres do Mar de Arousa), que retrata o día a día das traballadoras do mar.  O certame pretende amosar exemplos de mulleres que poidan servir de modelos proactivos e positivos. Podes ver o vídeo no seguinte enlace.

Novos PERMEX en Pontevedra

Convocado o proceso selectivo para a cobertura de vinte prazas de marisqueo a pé para o exercicio da actividade extractiva no ámbito territorial do plan de explotación conxunto, modalidade de a pé, na Confraría de Pescadores de Pontevedra.

Para obter máis información sobre esta convocatoria, podes consultar as bases premendo aquí.

Conxemar 2019

Do 1 ao 3 de outubro estivemos na XXI Edición da Feira Internacional de Produtos do Mar Conxelados, CONXEMAR que se celebrou no Instituto Ferial de Vigo. O stand da Consellería do Mar acolleu a presentación da Lonxa de Ribeira, contando con numerosa representación do sector pesqueiro artesanal galego, e do proxecto SEATRACES, do Instituto de Investigacións Mariñas. Tiveron presenza, con stand propio, as empresas certificadas Mariscos Daporta S.L., Conservas PortomarFrigoríficos de Camariñas, S.L.Frigoríficos Rosa de los Vientos, S.L.Frinsa del Noroeste, S.A. e Yatecomeré, S.L.

Mercado do mar

Os días 21 e 22 de setembro estivemos no Mercado do Mar, enmarcado no Festival Mar de Mares, amosando os oficios do mar, a marca pescadeRías e fomentando o consumo responsable dos produtos do mar.

Ademais, Ana Portals, do restaurante Solleiros Espazo Gastronómico, elaborou tres preparacións con fanecas, navallas e berberechos certificados durante o showcooking Tesouros das nosas Rías, celebrado na explanada de O Parrote, en A Coruña. Aquí podes ver un vídeo resumo.

II Festa da Empanada Mariñeira

O 27 e 28 de setembro celebrouse a II Festa da Empanada Mariñeira con produtos certificados polo selo pescadeRías. ¿de onde se non?, organizada polo Club de Piragüismo e a Confraría de Pescadores de Portonovo.

Demostracións de cociña para persoas adultas e nenos e nenas, maridaxes e concursos de empanadas populares e concursos entre confrarías, son parte das actividades que se levaron a cabo nesta cita gastronómica.

FICBUEU 2019

O 14 de setembro, directores/as e críticos/as de cine de varios países participantes no 12º Festival Internacional de Curtametraxes de Bueu – FICBUEU 2019, asistiron á actividade Descubrindo as excelencias do noso mar con pescadeRías, ¿de onde se non?. Realizaron unha visita guiada ao peirao, lonxa e praza de abastos, e degustaron produtos certificados nun showcooking  levado a cabo por Criselda Iglesias da Tapería Lecer de Cangas.

Aquí podes ver un vídeo con algunhas das imaxes que deixou a xornada. Fotografías de Prolight Foto Estudio.

IX Xuntanza de Bloggers

Un ano máis, produtos certificados polo selo pescadeRías, ¿de onde se non? acompañaron aos Bloggers Gastronómicos de Galicia na comida da súa xuntanza anual que se celebrou en A Coruña o 21 de setembro. Tito Fernández, xefe de cociña do Hotel NH Collection Finisterre de A Coruña, deseñou un menú no que o peixe e os moluscos certificados estiveron moi presentes. Participaron tamén nas elaboracións, os cociñeiros Gerson Iglesias e Pedro Lalo de Cociña Ourense e Juan Mato, do restaurante Artabria. Podes acceder a un vídeo resumo do encontro elaborado por NH Collection premendo aquí.

Saborea Galicia en Mar de Plata

Representantes de diferentes ámbitos profesionais de Mar de Plata asistiron os días 20 e 21 de setembro, ás presentacións do obradoiro Saborea Galicia en Mar de Plata, organizadas pola Secretaría Xeral da Emigración, en colaboración coas Consellerías do Mar e do Medio Rural, para a promoción de produtos do mar e agroalimentarios. O público asistente puido coñecer os produtos certificados de conservas Los PepetetesPorto-Muiños nos showcooking dirixidos por Daniel Guzmán, chef do restaurante Nova de Ourense. Aquí podes ver unha selección de fotografías do evento.

Premios economía azul

Xa está en marcha a II edición dos Premios Economía Azul, creados para recoñecer os proxectos destacados subvencionados polas axudas concedidas ao abeiro das Estratexias de Desenvolvemento Local Participativo, aprobadas para os Grupos de Acción Local do Sector Pesqueiro co obxectivo de promover o desenvolvemento sustentable das zonas de pesca.

Podes consultar os candidatos, que foron seleccionados entre os propostos polos Grupos de Acción Local do Sector Pesqueiro de Galicia (GALP), e votar ao teu favorito premendo aquí.

Adhesións

A peixería do ALCAMPO de Vilagarcía de Arousa, na que podemos atopar peixes e mariscos procedentes da pesca artesanal adquiridos en lonxas da contorna, adheriuse este mes ao selo pescadeRías, ¿de onde se non?.

Na cidade de Santiago de Compostela, os restaurantes Mamá Peixe, taberna mariñeira, Auga e Sal, Pampín Bar, O Curro da Parra e Café de Altamira, que ofertan de xeito habitual peixes e mariscos de tempada na súa carta, tamén se adheriron ao selo durante o pasado mes de setembro.

Certificacións e seguementos

En setembro, dúas novas empresas acadaron a certificación para comercializar os seus produtos baixo o selo pescadeRías, ¿de onde se non?: Real Conservera Española, S.L., para bivalvos, peixe e equinodermos, e a empresa distribuidora Joy Embassy, S.L., para bivalvos, cefalópodos, peixe, equinodermos e gasterópodos. Benvidos!

Por outra banda, a distribuidora de Burela Descaexport, certificada para cefalópodos, e a Lonxa de Muros, certificada para bivalvos, cefalópodos, crustáceos e peixe, superaron auditorías de seguemento da marca.

Convocatoria de axudas

Publicada a ORDE do 23 de setembro de 2019 pola que se establecen as bases reguladoras e a convocatoria de axudas destinadas aos familiares dos profesionais do mar falecidos no exercicio da súa actividade durante o ano 2019. Os beneficiarios das mesmas serán o cónxuxe ou parella de feito no momento do falecemento e os descendentes menores de 21 anos.

Podes consultar á ORDE premendo aquí.

Formación en Cabo de Cruz

En setembro, impartimos formación en Hixiene Alimentaria e Manipulación de Alimentos na Confraría de Pescadores de Cabo de Cruz. Participaron o persoal da lonxa, o patrón maior e a directiva da Agrupación de Mariscadoras.

Cabo de Cruz comercializa baixo o selo pescadeRías, ¿de onde se non?, os bivalvos procedentes dos seus bancos marisqueiros a pé e a flote, así como a navalla capturada a mergullo.

A receita do mes

O berberecho de Noia é un dos bivalvos estrela das nosas costas, que conta con recoñecemento a nivel nacional. O pasado mes de setembro comezou a extracción deste bivalvo, que se comercializa certificado polo selo pescadeRías, ¿de onde non?.

Rubén González, de El Cafetín de Pontevedra, ofrécenos unha proposta moi mariñeira para preparalo: Berberechos ao vapor de algas e salsa verde mariña acidulada. Podes vela premendo aquí.