As peixerías adheridas á marca pescadeRías ¿de onde se non? contan con dous novos espazos na nosa web, un para establecementos físicos e outro para tendas online. Trátase dun novo paso á hora de visibilizar os produtos da pesca artesanal galega nos puntos de venda, facilitando aos consumidores información sobre establecementos e tendas online que dispoñen habitualmente de produto certificado. No caso dos minoristas con punto de venda físico, facilítase o enderezo, contacto, horario de apertura e servizos que presta (cobro con tarxeta, reparto a domicilio, recollida de pedidos por teléfono, etc.) No caso das tendas online, a web remite á propia páxina do establecemento a través dunha ligazón.

Do 8 ao 11 de xuño celebrarase a 21ª edición do Salón da Alimentación do Atlántico SALIMAT-ABANCA en Silleda, onde a marca pescadeRías estará presente no stand da Xunta de Galicia.  A organización de Salimat habilitará un espazo de negocios onde as empresas expositoras poderán levar a cabo encontros con distribuidoras nacionais e internacionais de produtos alimentarios. O prazo para inscribirse como expositor está aberto ata o 21 de abril. Máis información sobre o evento e contacto aquí. Folla de inscrición aquí.

A campaña promocional de peixes e mariscos certificados pescadeRías continúa nas prazas de abastos de Santiago de Compostela, Cambados, Portonovo, Bueu, Sanxenxo, A Guarda, Pontevedra e Cee. Con cada compra de produtos certificados recibirás un boleto para participar nun sorteo que se celebrará os días 7 e 8 de abril. Poderás conseguir vales de compra de peixe e lotes de material promocional para ir á compra e cociñar: bolsas da compra, mandiles, manoplas de cociña, libretas de notas… consulta aquí as bases.

A Confraría de Pescadores de Aguiño e a Confraría de Pescadores La Anunciada de Baiona, ámbalas dúas certificadas por pescadeRías ¿de onde se non?, xestionan as lonxas onde se comercializou un maior volume de ourizo de mar na campaña que está a piques de rematar.  Lembra que, ademais de fresco, podes adquirir ourizo en conserva con garantía de orixe e calidade, consulta aquí os produtos certificados comercializados por conserveiras galegas. Máis información no artigo publicado por La Voz de Galicia o pasado 20 de marzo.

Do 3 ao 21 de abril celebraranse as Semanas do Mar na aula municipal de cociña de Ourense, un achegamento aos produtos da pesca artesanal galega, con actividades dirixidas a consumidores, restauradores, comercializadores, familias e público escolar.  O luns 3 e 17 haberá unha charla coloquio dirixida ao canal HORECA e profesionais de peixería, sobre manipulación de peixe; os martes 4 e 17, obradoiros para consumidores e de mércores a venres, actividades para escolares. Descarga aquí o programa de actividades.

Do 24 ao 27 de abril estaremos no Salón de Gourmets, en Madrid, onde nos acompañarán como coexpositores catro empresas certificadas: Conservas La Brújula–Ramón Peña, Currimar Conservas Tradicionais, Portomuiños e Conservera Gallega, ademais do stand do GALP Ría de Vigo-A Guarda, onde se agrupan as confrarías de A Guarda, Baiona, Redondela, Arcade, Vigo, Moaña, Vilaboa, Cangas e Aldán-Hío, todas elas certificadas pescadeRías.

A Asociación de Restauradores de Cangas-ARECA organiza as II Xornadas do Mar, o primeiro e segundo fin de semana de abril. No ámbito destas xornadas, o equipo técnico de pescadeRías colaborará na impartición dun Obradoiro de Pesca Sostible, xunto con Juan Souto, do Restaurante A Curva e Gustavo Soliño de Pandemillo Taberna Galega. O obradoiro celebrarase o xoves día 6, ás 11:00 no primeiro andar da praza de abastos de Cangas. Entrada libre. Descarga aquí o cartel do obradoiro e aquí o cartel cos restaurantes que participan nas xornadas.

Do 13 ao 15 de abril a Confraría La Anunciada de Baiona organizará as III Xornadas Divulgativas Gastronómicas Vive a Lonxa, protagonizadas por peixes e mariscos capturados pola flota artesanal deste porto. Na programación de actividades contan coa recreación de escenas mariñeiras, como a poxa pública ou o asado de ourizos; un acuario onde poderemos observar peixes e mariscos da zona; obradoiros artesanais para familias e postos de exhibición e venda de artesanía.

Durante o mes de marzo renovaron a súa certificación as lonxas de Baiona e Fisterra, certificadas para bivalvos, cefalópodos, crustáceos, equinodermos e peixes; Mariscos Cordal e Mariscos de Barallobre, depuradoras de bivalvos; a conserveira Jelopa SL, para bivalvos e equinodermos, e Conservas La Brújula para bivalvos, equinodermos, crustáceos e peixes. Ademais, Frigoríficos Rosa de los Vientos ampliou a súa certificación como transformador de cefalópodos a distribuidor de bivalvos e cefalópodos.

Damos a benvida a un novo establecemento adherido á marca pescadeRías: o Hotel Semáforo de Fisterra. Despois dunha reforma no ano 2016, o hotel reabriu as súas portas para ofrecer, xunto co aloxamento nun espazo tan singular, servizo de restaurante a base de peixes e mariscos procedentes da pesca artesanal galega. O restaurante aposta polo produto local e de tempada, e está adherido tamén a Km0 Mar Galaica, o selo de produtos locais da pesca  impulsado polo GALP Costa Sostible.

Con motivo da XXXI edición da Festa da Ostra, a Confraría Virxe do Carme de Arcade organizou unhas xornadas gastronómicas protagonizadas por produtos certificados pescadeRías: anguía, choco e ameixas. Espeto de anguía en tempura, empanada tradicional de choco, ensalada de anguía afumada, ameixas á tixola e ameixas ao coitelo foron os platos elaborados polos chefs Rebeca Moares, Pilar Martí, Fran Sotelino, Miguel Mosteiro e Manuel Garea. Podes ver un vídeo-resume do evento aquí.

Do 12 ao 14 de marzo celebrouse en A Coruña o Fórum Gastronómico. Polo stand da Xunta de Galicia pasaron profesionais da restauración, comercializadores de produtos do mar, profesorado e alumnado de hostelaría, empresas transformadoras, bloggers gastronómicos e consumidores interesados en coñecer os produtos da pesca artesanal galega. Ademais, sete empresas certificadas participaron como expositores. Podes ver un resumen das actividades da marca pescadeRías ¿de onde se non? neste vídeo.

O programa Comando Actualidad de RTVE emitiu o 28 de marzo unha reportaxe sobre o marisqueo na Ría de Noia e a extracción de navallas a mergullo en Esteiro, baixo o título Hortas do Mar. O programa amosa como se marisquea a pé e desde embarcación, e descubre un dos mellores manxares da nosa gastronomía: a empanada de millo de berberechos. Podes ver aquí o programa completo; do minuto 15 ao 27 e medio, marisqueo en Noia; a partir do minuto 41, navallas a mergullo en Esteiro.

Seguimos dando a coñecer a pesca artesanal galega e a certificación pescadeRías nos centros de formación en hostalería, dentro do programa «Do mar ao prato». En marzo visitamos a Escola de Hostalería Harina Blanca e o CIFP Manuel Antonio, ámbolos dous centros en Vigo; o Centro Superior de Hostalería de Galicia, en Santiago de Compostela, e o IES Fraga do Eume, en Pontedeume. Agradecemos a alumnado e profesorado o interese pola marca pescadeRías, ¿de onde se non?

No sorteo do mes de marzo, as persoas agraciadas foron Montse Meijide Vilariño, Maricarmen Castro Vázquez e María Guitián Vicente. Recibirán un lote de produtos promocionais da marca pescadeRías, ¿de onde se non? composto de bolsa da compra, camiseta, mandil, manopla de cociña, libreta de notas e bolígrafo. Parabéns!

En breve publicaremos o vindeiro sorteo na nosa páxina de Facebook. Síguenos!

O chef José Manuel Mallón, do Restaurante Casa Barqueiro, en Negreira, ofrécenos esta versión de lamprea a baixa temperatura en guiso de Albariño e allo porro con queixo DOP San Simón da Costa que fará as delicias tanto daquelas persoas que son incondicionais da lamprea como das non iniciadas. Podes ver a receita completa aquí.

Se queres que publiquemos a túa receita, envíanola por correo-e, indicando ingredientes, elaboración e unha foto.