O 26 de marzo, a Lonxa de Ribeira foi o escenario da entrega dos certificados da marca de garantía pescaenverde ás lonxas certificadas pola marca pescadeRías, ¿de onde se non?, no marco da alianza entre a Universidade de Santiago de Compostela e a Consellería do Mar. Recibiron o recoñecemento as confrarías de pescadores de Cabo de Cruz, Cedeira, Ferrol, Pobra do Caramiñal, Vilaxoan e a Lonxa de Ribeira S.L. Con estas seis entidades, son 39 as lonxas e centros de primeira venta que usan as marcas pescadeRías e pescaenverde nas súas etiquetas.

A marca pescaenverde, creada polo Grupo de Investigación de Biotecnoloxía Ambiental da Universidade de Santiago de Compostela, aporta información ao consumidor sobre o impacto que os produtos pesqueiros teñen sobre o medioambiente, a través de dous indicadores: a pegada de carbono e a taxa de retorno enerxética-TRE.

O acto foi presidido pola conselleira do Mar, Rosa Quintana, o reitor da Universidade de Santiago de Compostela, Antonio López Díaz e a tenente de alcalde do concello de Ribeira, María Sampedro.

O Parlamento Europeo, destaca como historia do mes, no seu boletín de novas de febreiro, o proxecto da marca pescadeRías, ¿de onde se non?, apoiado polo Fondo Europeo Marítimo e de Pesca (FEMP). A noticia amosa a importancia da marca na promoción e posta en valor dos produtos procedentes da pesca artesanal, así como a variedade de axentes implicados e o aseguramento da trazabilidade en toda a cadea de valor dos produtos certificados, ata chegar ás persoas consumidoras. Preme aquí para ver a nova publicada no boletín do Parlamento Europeo.

No mes de marzo, comezou o programa formativo en centros de Hostalaría / Industrias Alimentarias de Galicia. Nas charlas e obradoiros prácticos dáse a coñecer ao alumnado a marca pescadeRías, ¿de onde se non?, o seu significado, os produtos, os requisitos e o seu funcionamento. Os centros participantes durante este mes foron: Programa de emprego O Pote II de Ribeira, Escola Hostalaría Álvaro Cunqueiro de A Coruña, Escola de Especialidades da Estación Naval da ESENGRA en Ferrol, I.E.S de CATABOIS de Ferrol (Industrias alimentarias) e Escola de Hostalaría San Javier de A Coruña.

O ourizo é un equinodermo que vive en fondos rochosos cubertos de algas, aínda que tamén en fondos areosos con algas coralinas.

Atópase desde augas superficiais ata 80 m de profundidade, sendo máis abundante por riba dos 20 m, sobre todo en zonas de rompente. Extráese a pé e a mergullo en apnea ou con subministro de aire desde superficie. De plena tempada no mes de marzo, do ourizo só se consume a gónada.

Preme aquí para coñecer máis información sobre este equinodermo.

O 31 de marzo, finalizou o período autorizado para a captura do lumbrigante en Galicia, que será permitida de novo o 1 de xullo. Tamén nesta data, rematou a campaña da volandeira na Ría de Arousa.

Do 15 de abril ata o 15 de novembro, terá lugar a campaña da zamburiña na Ría de Ferrol. A zamburiña en Galicia captúrase case na súa totalidade nesta Ría, e é explotada polas confrarías de Ferrol, Mugardos e Barallobre. O 19 de abril comeza a campaña da vieira en Redondela, que previsiblemente durará dúas semanas.

O luns, 23 de marzo, comezou a campaña de extracción da vieira na Ría de Ferrol. 12 embarcacións procedentes das Confrarías de Pescadores de Ferrol, Barallobre e Mugardos descargaron as súas capturas na Lonxa de Ferrol.

A campaña prolongarase ata mediados de abril cun tope diario de 3.000 kg, entre todos os barcos. Tras pasar por un proceso de depuración, eviscerarase nas empresas Vieiras de Ferrol S.L. e Porto de Cambados S.L., ambas entidades certificadas polo selo pescadeRías, ¿de onde se non?.

Os pepinos do mar, son especies con ampla presenza nas nosas costas. Aínda que no noso territorio non esteamos habituados ao seu consumo, algunhas confrarías galegas contan con plans para a súa explotación polo seu interese comercial noutras comunidades ou países. As 4 especies amparadas pola marca son: cogombro de mar vermello (Parastichopus tremulus), cogombro de mar negro (Holothuria forskali), cogombro de mar tubo (Holothuria tubulosa) e cogombro de mar real (Parastichopus regalis). Preme aquí para saber máis.

O pasado mércores 30 de marzo, rematou a campaña marisqueira na Ría de Noia, na que participaron arredor de 1500 persoas autorizadas para a extracción de berberecho, ameixa fina, ameixa babosa e ameixa xaponesa, entre mariscadores/as a pé e dende embarcación.  Os bivalvos comercializados na lonxa de Testal e o centro de primeira venda de O Freixo están certificados polo selo pescadeRías, ¿de onde se non?.

Coincidindo coa apertura da campaña da vieira na ría de Ferrol, a empresa certificada Vieiras de Ferrol, S.L., reiniciou a súa actividade como centro autorizado para o eviscerado deste bivalvo. Vieiras de Ferrol, S.L. comercializa vieiras e zamburiñas evisceradas,  conxeladas ou en fresco, e co selo pescadeRías busca a posta en valor dos seus produtos.

A Secretaría Xeral de Pesca, do Ministerio de Agricultura, Pesca e Alimentación, ven de publicar tres resolucións polas que establecen disposicións adicionais da pesquería da xarda (Scomber scombrus) das zonas VIIIc e IXa, para os buques da frota doutras artes distintas ao arrastre e cerco do Cantábrico e Noroeste, con porto base nas provincias de Pontevedra, A Coruña e Lugo.

O pasado 16 de marzo tivo lugar unha charla informativa a minoristas da praza de abastos de Ribeira sobre a marca de calidade pescadeRías, ¿de onde se non?.

A marca distingue a peixes e mariscos procedentes da pesca artesanal, sendo a Lonxa de Ribeira unha das máis importantes lonxas de baixura en Galicia en canto a volume de ventas.

Nos mercados de abastos podemos atopar unha ampla variedade de produtos frescos do día, amparados polo selo. Mira as etiquetas e busca o distintivo.

Fresco y del mar, a peixería online de Mariscos A Insua S.L., que ofrece peixe e marisco fresco galego procedente da pesca artesanal da Costa da Morte e da Ría de Muros e Noia, adheriuse o pasado mes ao selo pescadeRías, ¿de onde se non?. Así mesmo, en Carril, contamos coa adhesión de Peixería Lucía, que tamén realiza unha ruta de reparto como peixería ambulante pola contorna.

Por outra banda, en Cedeira, no Restaurante Vilavella, tamén adherido en marzo, podemos degustar peixes e mariscos de tempada da lonxa desta localidade.

En marzo acadaron a certificación as seguintes empresas: Fish Factory, S.L., distribuidor de conservas de peixe e bivalvos, José Javier Lago Figueiras, distribuidor de peixe, cefalópodos e crustáceos, Mariscos A Ínsua, S.L., distribuidora de bivalvos, crustáceos, cefalópodos, peixe e equinodermos e a depuradora e cetária Murosmar, S.L.U. (bivalvos e crustáceos). HQ Seaweed ampliou a súa certificación á transformación de algas, Conservas Portomar (bivalvos e equinodermos) ampliou o seu alcance á transformación de peixe e a Lonxa de Muros (bivalvos, cefalópodos, crustáceos e peixe) ampliouno a equinodermos.

A Consellería do Mar convoca tres cursos de mariñeiro/a pescador/a na modalidade online que terán lugar entre o 18 de maio e o 25 de xuño de 2021 cunha duración de 50 horas. As accións formativas serán impartidas pola Escola Oficial Náutico-Pesqueira de Ferrol, a Escola Oficial Náutico-Pesqueira de Ribeira e o Instituto Politécnico Marítimo-Pesqueiro do Atlántico de Vigo, correspondendo 60 prazas a cada unha delas. O período de inscrición remata o vindeiro 16 de abril ás 15:00 horas. Podes consultar máis información premendo aquí.

A dieta atlántica, na cal peixes e mariscos son unha parte importante e característica, é moi respectuosa co medio ambiente, axudando a cumprir os Obxectivos de Desenvolvemento Sustentábel definidos pola ONU, e sendo unha das que presentan unha menor pegada de carbono e hídrica.

Premendo aquí atoparás un artigo do catedrático da Universidade de Santiago de Compostela Gumersindo Feijoó sobre a dieta atlántica como hábito de vida saudable e sustentable e a importancia das ecoetiquetas.

En O Camiño do Inglés, ubicado no barrio de Ferrol Vello, a escasos metros do porto,  o chef Daniel López aposta  polos produtos de proximidade, con ampla presenza de peixes e mariscos na súa carta, sempre adaptada ás mellores materias primas de tempada.

Conforme a esta filosofía, non podían faltar estes días no seu restaurante as vieiras da Ría de Ferrol, que prepara mariñadas en café e soia con emulsión cítrica e acompañadas de agróns.  Preme aquí para ver a súa receita.