O mar está moi presente na tradición oral mariñeira dos municipios costeiros. A fala mariñeira trasládase á vida cotiá e ao xeito de relacionarse nas vilas mariñeiras, a través de ditos, expresións, vocábulos e refráns. Andas aboiado, chove a mares, é un bo peixe, tes cara de faneca, a raia en xaneiro sabe a carneiro son só algúns exemplos.

Cóntanos algunha expresión, palabra ou refrán que coñezas no que o mar sexa o protagonista e participarás nun sorteo de dous lotes de conservas certificadas (un entre os/as nosos/as seguidores/as en facebook e outro para os/as de instagram) que realizaremos o 16 de decembro.

Para participar:
1. Ser seguidor/a da nosa páxina de facebook ou instagram
2. Darlle gústame á publicación do sorteo
3. Cita en comentarios algunha expresión, dito, palabra ou refrán que utilices ou coñezas relacionada co mundo do mar

As lonxas das Confrarías de Pescadores de Malpica e Ferrol, comezaron a realizar etiquetado individual co selo pescadeRías, ¿de onde se non? nos mellores exemplares de peixes que poñen a subasta na lonxa.

O etiquetado individual permite aos/ás consumidores/as recoñecer facilmente os produtos certificados no mercado. As etiquetas están personalizadas co nome da lonxa de procedencia do peixe.

Con estas, son xa 11 as lonxas que realizan este tipo de etiquetado.

O luns 25 de novembro, comezaron as extraccións de vieira na Ría de Arousa, previa autorización polo INTECMAR.

A vieira procedente de Galicia, que podemos atopar nos mercados tanto fresca como conxelada, cumpre con todos os requisitos de seguridade alimentaria. Tras a captura, pasa por un proceso de depuración e eviscerado e por estritos controis  analíticos establecidos na ORDE de 15 de xaneiro de 2002 pola que se regula a extracción e comercialización de vieira (Pecten maximus). Premedo aquí podes acceder a máis información sobre esta especie.

A mediados de novembro rematou a campaña da zamburiña (Chlamys varia) na Ría de Ferrol, que comezara o 15 de abril deste ano.

A meirande parte das capturas desta especie en Galicia, proceden da Ría de Ferrol, e comercialízanse nas lonxas de Ferrol e Barallobre, ambas certificadas polo selo pescadeRías, ¿de onde se non?. Durante a tempada de extracción, as persoas consumidoras poden adquirir as zamburiñas nas depuradoras das dúas lonxas, que realizan venta directa deste molusco bivalvo.

O 3 de decembro no espazo «Ciencia e Innovación Diálogos» na COP25, presentouse a ecoetiqueta «pescaenverde: Unha nova ecoetiqueta no sector pesqueiro» a cargo de Fernando Pardo, técnico de Transferencia de Tecnoloxía da USC. Como exemplo de implantación da ecoetiqueta, expúxose o caso de éxito da alianza pescadeRías – pescaenverde, como un referente no que se conxugaron intereses de ambas partes para promocionar e favorecer o consumo de produtos de proximidade en Galicia. Esta colaboración encaixa dentro dos ODS: 12 (Produción e consumo responsable), 13 (Acción polo clima), 14 (Vida submarina) e 17 (Alianzas para lograr os obxectivos).

Unha delegación do GALP Ría de Vigo – A Guarda, realizou unha visita a proxectos financiados polo FEMP ao abeiro da Estratexia de Desenvolvento Local Participativo do GALP Ría de Pontevedra.

A delegación estivo formada pola xerente do GALP Ría de Vigo – A Guarda, Elena Herbello, e por patróns/as maiores e membros do cabido das Confrarías de Vilaboa, A Guarda, Vigo e Baiona, que visitaron as empresas certificadas Mares de Galicia, S.A.,  Frigoríficos Rosa de los Vientos, S.L. e a lonxa da Confraría de Pescadores de Bueu, tamén certificada polo selo.

Un grupo de alumnos/as e profesores/as do Centro Superior de Hostalería de Galicia (CSHG) visitaron a empresa O Percebeiro S.L., certificada pola marca pescadeRías, ¿de onde se non?, que distribúe peixes e mariscos procedentes da pesca artesanal, amparados polo selo.

Durante a xornada, puideron coñecer os produtos que comercializan desde a súa recepción, depuración, envasado e posterior distribución. Para rematar, participaron nun showcooking a cargo de Iñaki Bretal e nunha cata maridaxe a cargo de Luis Barrero de Viñedos Singulares. 

Pan do Mar, a marca de conservas da empresa Antonio Pérez Lafuente S.A., acaba de ser recoñecida co selo “Calculo-Reduzco-Compenso” outorgado polo Ministerio para a Transición Ecolóxica polo seu compromiso co desenvolvemento sostible.

As súas conservas, elaboradas con produtos procedentes da pesca artesanal e responsable, están certificadas pola marca pescadeRías, ¿de onde se non?. Parabéns!

Do 14 ao 16 de novembro, a empresa certificada polo selo pescadeRías, ¿de onde se non?, Real Conservera Española, S.L., asistiu á Melting Gastronomy Summit na Alfándega de Oporto, invitados por INTERNOVA e auspiciados por INTERREG.

Foron tres días de encontros comerciais entre profesionais da gastronomía lusa e galega, onde se estableceron contactos con clientes directos e empresas distribuidoras.

O 21 de novembro presentouse en Vilagarcía de Arousa, o estudo sobre A Situación Profesional das Mulleres do Mar de Arousa promovido polo Grupo de Acción Local do Sector Pesqueiro Ría de Arousa, co obxectivo de realizar unha radiografía da realidade social e profesional deste colectivo e amosar os avances, en materia de igualdade no sector. As conclusións obtidas foron o resultado do traballo de campo realizado con empresas e entidades do sector e cuestionarios e entrevistas a profesionais do eido marítimo-pesqueiro.

Publicada a RESOLUCIÓN do 23 de outubro de 2019 pola que se autoriza o plan de xestión de pesca coa arte de bou de vara e a arte de rapeta ou bou de man.

O período autorizado será dende o 1 de novembro de 2019 ata o 31 de marzo de 2020, ambos incluídos. Estas artes son utilizadas principalmente para a captura de volandeira e zamburiña, autorizándose o seu uso na Ría de Arousa, no caso do bou de vara e nas Rías de Arousa, Pontevedra e Vigo, para o bou de man.

En novembro deuse a coñecer a listaxe de restaurantes co distintivo Estrelas Michelín de cara ao 2020, sendo 11 os restaurantes galegos que manteñen este galardón, 7 deles adheridos ao selo pescadeRías, de onde se non?. A maiores, 28 restaurantes galegos están distinguidos na categoría Bib Gourmand, coa que se recoñecen establecementos que ofrecen unha cociña de altísima calidade, a un precio axustado, sete deles adheridos tamén ao selo. Aquí podes ver as listaxes completas: Estrelas Michelín e Bib Gourmand.

Este mes tivemos 3 novas incorporacións ao selo pescadeRías, ¿de onde se non? na provincia de A Coruña.

Os restaurantes A Casa da Viña e Don Quijote, en Santiago de Compostela, e o Restaurante Marcial, en Narón, adheríronse ao selo de calidade. Todos eles ofrecen nas súas cartas peixes e mariscos procedentes da pesca artesanal, que contan coa garantía que ofrece a marca.

Benvidos!

Aberto o prazo para a presentación de solicitudes de axudas para a convocatoria de 2020, do programa FEMP 2014-2020.  Poden ser presentados proxectos para inversións produtivas ou non produtivas que cumpran os seguintes requisitos: Contribuír aos obxectivos da estratexia de desenvolvemento local participativo (EDLP) aprobada para a zona pesqueira onde se vai desenvolver, estar localizados no ámbito territorial elixible de cada GALP,  ser viables técnica e economicamente e axustarse á normativa sectorial que resulte de aplicación para cada tipo de proxecto. O prazo remata o 1 de marzo, preme aquí para acceder ao procedemento.

En Novembro tiveron lugar dúas charlas dirixidas ao sector da restauración, en Santiago de Compostela e Ferrol, baixo o título pescadeRías, ¿de onde se non? & pescaenverde, a Alianza para o Consumo Responsable. Dispor de información sobre ambos selos é de interese para o sector e unha oportunidade, pola súa condición de presciptores de produtos procedentes da pesca artesanal e sustentable.

Por outra banda, o persoal da peixería do hipermercado Alcampo de Santiago de Compostela, recentemente adherida ao selo pescadeRías, ¿de onde se non?, recibiu formación sobre a marca.

A volandeira (Aequipecten opercularis) é un produto moi adecuado para incluír no noso menú de Nadal, que ademáis se atopa en plena tempada, xa que o pasado mes comezou a súa campaña na Ría de Arousa.

Dende o restaurante ubicado no Barrio de San Lázaro en Santiago de Compostela A Casa da Viña, adherido este mes ao selo pescadeRías, ¿de onde se non?, fannos esta interesante proposta para preparalas: Volandeira con salsa vinagreta de chalotas, trufa negra e AOVE.

Preme aquí para ver a receita.