A  partir do mes de marzo, a marca pescadeRías, ¿de onde se non?  comezará a impartir un programa formativo en centros de Hostalaría de Galicia.

Desenvolveranse charlas informativas e obradoiros prácticos para dar a coñecer ao alumnado o significado, os produtos, os requisitos e o funcionamento da marca pescadeRías, ¿de onde se non?, así como amosar os oficios do mar e as artes de pesca, o etiquetado e a trazabilidade dos produtos do mar. Aprenderán a coñecer e a diferenciar especies de interese comercial e fomentarase o consumo responsable e o cumprimento da seguridade alimentaria, entre outros.

Publicada a RESOLUCIÓN do 28 de xaneiro de 2021 pola que se autoriza o Plan de pesca de anguía para as confrarías de pescadores da ría de Arousa para a tempada 2021 e a RESOLUCIÓN do 28 de xaneiro de 2021 pola que se autoriza o Plan de pesca de anguía para as confrarías de pescadores da ría de Vigo para a tempada 2021. O período autorizado para a súa captura, en ambos casos, vai do 1 de febreiro ata o 31 de outubro.

Os peixes e mariscos son unha importante fonte de proteínas de alto valor biolóxico, é dicir, que conteñen aminoácidos esenciais para o noso organismo, e nos aportan vitaminas e minerais. Premendo nas seguintes ligazóns, podes consultar os principais valores nutricionais de tres especies certificables polo selo pescadeRías, ¿de onde se non?: a solla (Platichthys flesus), o camarón común (Palaemon serratus) e a lura (Loligo vulgaris).

O choco está en plena tempada e comercialízase baixo a certificación pescadeRías, ¿de onde se non? en numerosas lonxas galegas.

O hábitat deste cefalópodo son fondos areosos cubertos de algas e zostera, e podemos atopalo dende augas superficiais ata os 200 metros de profundidade. Se queres coñecer máis curiosidades sobre esta especie preme nesta ligazón.

Resolución da Dirección Xeral de Desenvolvemento Pesqueiro, pola que se convocan exames ordinarios teórico-prácticos de carácter libre para as titulacións de mariñeiro/a pescador/a, patrón/patroa local de pesca e patrón/patroa costeiro/a polivalente na Comunidade Autónoma de Galicia para o ano 2021 (código do procedemento PE607C). Prazo de matrícula aberto ata o 15 de marzo.

A primeiros de marzo, o distribuidor de cefalópodos, peixe e crustáceos José Javier Lago Figueiras, recibiu nas instalacións da lonxa de Muros formación en Hixiene e Manipulación de alimentos, de cara a súa certificación no selo pescadeRías, ¿de onde se non?.

Acreditar formación nestas materias é requisito indispensable para acadar a certificación no selo de calidade.

Publicada convocatoria de axudas a proxectos de rexeneración que permitan mellorar a produtividade dos bancos marisqueiros con problemas de perda de produción e que contribúan a unha mellora da xestión e conservación sustentables dos recursos mariños. Dirixidas a confrarías de pescadores, organizacións de produtores, cooperativas do mar e demais asociacións de profesionais do sector. En prazo ata o 8 de marzo.

Publicada convocatoria de axudas autonómicas para proxectos colectivos de modernización das infraestruturas dos portos pesqueiros, lonxas e lugares de desembarque para a mellora da eficiencia enerxética, da protección do medio ambiente, da seguridade e as condicións de traballo, e da calidade e do control e rastrexabilidade dos produtos desembarcados da pesca.

En prazo ata o 10 de marzo.

Convocados procesos selectivos para a obtención de PERMEX de marisqueo e recursos específicos (anémones, percebe, solénidos) nas confrarías de Baiona,  Vilanova de Arousa, O Pindo, Malpica, Pontedeume, Muxía, Cabo de Cruz, Fisterra, Corcubión, Lira, Corme e Rianxo.

Podes atopar toda a información sobre as diferentes convocatorias na sección de anuncios do portal da Consellería do Mar. Accede premendo aquí.

Na Praza de Abastos de Bueu, onde a maioría dos peixes e mariscos que atopamos proceden da lonxa desta localidade, contamos este mes cunha nova peixería adherida: Mariscos e Bacalao Rosana.

Temos así mesmo unha nova adhesión na Praza de Abastos de Pontevedra: Pescados y Mariscos Cachadas. No seu posto ofrece  unha grande variedade de produtos pesqueiros e marisqueiros de diferentes lonxas galegas, capturados de xeito artesanal.

Este mes contamos con tres novas adhesións: En Pontevedra, na Praza da Leña, o restaurante O Eirado, que conta cunha Estrela Michelín e un Sol Repsol, e anexo ao mesmo, A Tapería Loaira, ofrecen na súa carta unha variada mostra de produtos do mar de tempada procedentes da nosa pesca artesanal. Por outra banda, en Madrid, no restaurante Farmacia de Guardia, situado no Barrio de Malasaña, podemos atopar orixinais elaboracións con produtos de O Percebeiro, entidade certificada polo selo pescadeRías, ¿de onde se non?.

A Confraría de Pescadores da Pobra do Caramiñal acaba de obter a certificación da marca pescadeRías, ¿de onde se non?. A entidade xa pode comercializar os bivalvos, cefalópodos, peixes e crustáceos que venden na súa lonxa baixo o selo de calidade que identifica e promociona os produtos procedentes da pesca artesanal.

Por outra banda, Frigoríficos Moldes S.L. renovou a súa certificación na marca como transformador para os grupos biolóxicos cefalópodos e algas.

Publicada a RESOLUCIÓN do 3 de febreiro de 2021 pola que se ordena a publicación do Acordo do Consello da Xunta de Galicia do 28 de xaneiro de 2021 polo que se aproba a revisión do Plan territorial de continxencias por contaminación mariña accidental da Comunidade Autónoma de Galicia.

Neste Plan, determínase o protocolo de actuación dos distintos departamentos da Comunidade Autónoma que teñen competencia directa nas actuacións do mesmo, así como a actuación ou participación que a outras administracións lles corresponde neste tipo de sucesos.

Nos caladoiros galegos podemos atopar máis de 20 especies de cetáceos, sendo inevitable a interacción destes coa frota pesqueira, coa que comparten un mesmo espazo.  Neste escenario, o proxecto VIRADA, posto en marcha pola CEMMA, ten como obxectivo contribuir á protección da biodiversidade mariña e á sustentabilidade da pesca mediante a redución das capturas accidentais de cetáceos, en colaboración co sector pesqueiro. Podes ter máis información sobre este proxecto neste artigo de José Martínez Cedeira, presidente da CEMMA, especialista en estudos de interacción cetáceos-pesca.

Axeitada para os últimos días do inverno, a nosa proposta para este mes é unha receita tradicional da nosa cociña, caldeirada de pescada preparada polo chef Iñaki Bretal do restaurante O Eirado de Pontevedra.

Iñaqui Bretal, forma parte do Grupo Nove. A súa cociña aposta por produtos galegos de calidade, con gran presenza dos produtos do mar, que elabora destacando o mellor sabor de cada un deles, coidando a súa orixe e autenticidade.

Preme aquí para acceder a receita.