pescadeRías en Conxemar 2017

Do 3 ao 5 de outubro estaremos na Feira Internacional de Produtos do Mar Conxelados (CONXEMAR), que se celebrará no Instituto Feiral de Vigo-IFEVI, dando a coñecer a certificación pescadeRías ¿de onde se non? e as empresas certificadas baixo o noso selo de calidade.  Terán presenza con stand propio na feira as empresas certificadas Mariscos Daporta SL, Frigoríficos de Camariñas, Frigoríficos Rosa de los Vientos e Yatecomeré.  Ademais, a empresa Pulponor S. Coop. Galega presentará o seu polbo certificado pescadeRías no stand da Consellería do Mar-Xunta de Galicia (I13) o martes 3 ás 16:30 h.


Melloras na nosa web

Seguimos introducindo melloras na web deondesenon.xunta.gal. Nesta ocasión incorporamos un Centro de Apoio en liña para facilitar a comunicación coas empresas usuarias da marca e proporcionar solucións a problemas que poidan xurdir no uso diario da marca. Preme aquí para acceder ao Centro de apoio en liña. Tamén podedes seguir contactando co equipo de xestión da marca a través dos cauces habituais, ben vía telefónica ou por correo-e.

Mercado do Mar 2017

Estivemos no Mercado do Mar 2017, que se celebrou en A Coruña no ámbito do Festival Mar de Mares.  Ademais dun posto informativo para dar a coñecer a marca pescadeRías, ¿de onde se non?, o sábado impartiuse o showcooking Tesouros das nosas Rías. A cociñeira Lucía Freitas sorprendeunos con tres elaboracións de navalla, berberecho e pinto.  Entre as empresas expositoras,  Currimar Conservas Tradicionais, certificada pescadeRías. Preme aquí para ver as imaxes do evento.

Artesanía no prato

Acaban de celebrarse as I Xornadas Artesanía no prato no Museo Gaiás da Cidade da Cultura de Galicia, organizadas pola Consellería de Economía, Emprego e Industria, a través da Fundación Centro Galego da Artesanía e do Deseño. Nestas xornadas, destinadas a evidenciar o valor da artesanía no ámbito da restauración, as conservas certificadas baixo o selo pescadeRías protagonizaron a sesión «Artesanía na Lata».

Con Cristina Mittermeier

Acompañamos á prestixiosa fotógrafa Cristina Mittermeier durante varias xornadas nas que percorreu coa súa cámara a costa galega, a fin de coñecer e fotografiar a pesca artesanal galega e o traballo das mulleres do mar.  Deixámosvos aquí unha mostra dos seus vídeos, elaborado durante a súa visita á Ría de Muros e Noia.

Programa Fundación Juana de Vega

Está aberta a convocatoria do VI Programa de Emprendemento Agroalimentario da Fundación Juana de Vega dirixido a iniciativas empresariais nos eidos agroalimentario, forestal, marisqueiro e pesqueiro. Descarga aquí as bases da convocatoria. Para máis información, preme aquí. O prazo de presentación de propostas remata o 3 de novembro.

Premios Economía Azul

Varias entidades certificadas por pescadeRías optan aos I Premios Economía Azul, unha iniciativa da Consellería do Mar para recoñecer aos proxectos subvencionados no ano 2016. Os candidatos foron seleccionados entre os propostos polos Grupos de Acción Local do sector Pesqueiro de Galicia (GALP). Podes votar ao teu favorito ata o 22 de outubro premendo aquí.

Certificacións

Durante o mes de setembro renovou a súa certificación o punto de primeira venda da Agrupación de Mariscadoras Río Anllóns, dedicada á extracción e comercialización de moluscos bivalvos. O seu principal recurso é un berberecho de gran calidade, que comercializan baixo a marca Berberecho do Anllóns e está amparado polo selo pescadeRías ¿de onde se non? Parabéns!

Sementeira na Illa de Arousa

A Confraría de A Illa de Arousa segue a repoboar os seus bancos marisqueiros. Durante o pasado mes de setembro sementaron millón e medio de unidades de ameixa xapónica e medio millón de ameixa babosa, dun tamaño medio entre 18 e 22 mm.  Nuns meses estarán nos mercados, co selo identificativo de calidade pescadeRías ¿de onde se non?

pescadeRías, de cine!

Alfombra vermella, luces e moito glamur para os produtos certificados procedentes da pesca artesanal galega, que compartiron cartel coas estrelas do 10º Festival Internacional de Curtametraxes de Bueu-FicBueu 2017.  O público que asistiu á gala de clausura tivo ocasión de degustar produtos de película: polbo e navallas certificados pescadeRías, ¿de onde se non?, Mexillón de Galicia e Bonito de Burela.

De visita con Guimatur

A comezos de setembro, a gañadora do noso anterior sorteo, Silvia Giménez Amoedo, gozou do seu premio, visitando a zona de marisqueo a pé de O Serrido. Tamén coñeceu a actividade diaria no porto e a comercialización dos produtos na lonxa da man de Victoria Oubiña, da Asociación Guimatur Cambados. Agradecémoslle tanto a Victoria como a Guimatur a súa colaboración na difusión dos oficios do mar e da cultura mariñeira, que fixeron deste premio unha experiencia inesquecible.

Sorteo 8000 fans en Facebook

Xa case sumamos 8000 fans na nosa páxina de Facebook!! Así que toca celebralo. Nesta ocasión, cando cheguemos a esa cifra sortearemos un lote de conservas certificadas pescadeRías, ¿de onde se non? Para participar só tes que seguirnos na nosa páxina de Facebook.

Se aínda non es fan, a que esperas para visitarnos? Moita sorte!

A receita do mes

Chegou o outono! E con el, esta receita 5 estrelas que comparte con nós Miguel González Quintela, chef do Gastrobar Restaurante Sanmiguel en Ourense. Nada menos que a «Vieira de Outono» gañadora da III Gala Show Cooking “Mellor cociñeiro de Tapas por Galicia 2016”. Podes ver a receita completa aquí.

Se queres que publiquemos a túa receita, envíanola por correo-e, indicando ingredientes, elaboración e unha foto.