O 5 de xullo, no marco do selo pescadeRías, ¿de onde se non?, tivo lugar o primeiro dos cursos de recoñecemento de especies de interese comercial na lonxa de Ribeira. Esta actividade formativa está dirixida a persoal de lonxas e ten como obxectivo mellorar o coñecemento das especies pesqueiras amosando as características máis importantes da súa anatomía, chaves para a identificación das especies que poden levar a confusión. O curso foi impartido por Rafael Bañón, doutor en ciencias biolóxicas e experto ictiólogo. Á acción formativa convócase tamén ao persoal das lonxas próximas ao lugar de celebración para que poidan asistir.

Nos próximos meses organizaranse máis cursos nas principais lonxas certificadas que subastan capturas de peixe.

Xa temos gañadora do sorteo de verán. A premiada é Margarita Ríos, que recibiu un vale por valor de 100 € para gozar nun restaurante adherido ao selo pescadeRías, ¿de onde se non?. Parabens!

Coñeces os establecementos de restauración adheridos á marca pescadeRías, onde podes degustar produtos da pesca artesanal? Na nosa web podes atopalos, preme aquí para consultar o listado completo.

En Fish Factory S.L., empresa certificada polo selo pescadeRías, ¿de onde se non? para moluscos bivalvos e peixes, distribúen conservas de calidade excepcional baixo a marca La Curiosa, elaboradas de forma artesanal.

Cabe destacar tamén o orixinal deseño das latas de conservas, nas que narran os principais feitos de cada ano, desde 1940 ata a actualidade.

A sardiña (Sardina pilchardus) é un peixe azul de pequeno tamaño, corpo alongado e esvelto, cor azul verdosa e ventre prateado. Durante os meses estivais está no seu mellor momento de consumo, coa cantidade de graxa axeitada.  Rica en proteínas de alto valor biolóxico, destaca polo alto contido en ácidos graxos omega 3, entre outras calidades nutricionais. Na cociña é moi versátil e admite múltiples preparacións tanto fresca como en conserva. Preme aquí para saber máis.

O 1 de xullo, nécoras e lumbrigantes regresaron ás lonxas galegas despois de finalizar o período de veda para ambos crustáceos. O 5 de xullo finalizou a veda do polbo conforme se recolle no plan experimental para a xestión desta especie. En canto aos peches, a centola entrou en veda o pasado 19 de xuño desde a desembocadura do río Miño ata o cabo de Estaca de Bares e o 26 de xuño entre Estaca de Bares e o Río Eo. Por outra banda, publicouse a Resolución pola que se autoriza o Plan de Xestión coa arte de boliche entre os meses de xullo e  outubro de 2021.

Periodistas procedentes de Francia, Portugal, Navarra, Aragón, Madrid, La Rioja, Burgos, Palencia, León, Lugo e Santiago de Compostela, integrantes da Liga de Asociacións de Periodistas do Camiño de Santiago e asistentes á entrega do VIII Premio Internacional Aymeric Picaud de divulgación periodística do Camino de Santiago á editorial francesa Le Vieux Crayon, coñeceron e degustaron os produtos certificados polo selo pescadeRías, ¿de onde se non? nunha cea mariñeira que tivo lugar o 26 de xuño no hotel Bela Fisterra.

A lagosta é un crustáceo de corpo moi robusto, cor vermella ou violeta parda, e con manchas amarelas simétricas sobre o abdome. A cabeza ten moitas espiñas e longas antenas. Habita en fondos rochosos e captúrase de xeito artesanal con nasas especiais ou con artes de enmalle. A súa veda é durante o último trimestre do ano, polo que en verán podemos desfrutar deste prezado marisco, baixo en graxas e rico en vitaminas, minerais e proteínas de alto valor biolóxico. Preme aquí para ver unha ficha que contén máis información sobre  os seus valores nutricionais.

A Confraría de Pescadores e o Concello de Cedeira, no marco do proxecto Pesca de Costa – CEDEIXURA, realizaron o vídeo Sabor a Cedeira co obxectivo de visibilizar a calidade diferencial e a trazabilidade dos produtos da pesca de baixura e do marisqueo. O vídeo amosa tamén o traballo do sector minorista da peixería Costa Ártabra e da peixería Rosa, así como do restaurante Vilavella, todos eles adheridos ao selo pescadeRías.

Así mesmo, organizaron 2 showcooking dirixidos ao sector da hostalaría con peixes e bivalvos certificados da Lonxa de Cedeira dirixidos polos cociñeiros Iñaki Bretal, do restaurante O Eirado, e por Miguel A. Campos, do restaurante A Gabeira, ambos adheridos a pescadeRías. Preme aquí para ver o vídeo.

No mes de xuño, impartiuse formación en Hixiene e Manipulación de alimentos ao persoal da Lonxa de Vilanova de Arousa, da Lonxa de Porto do Son e da Lonxa de Portonovo.

Acreditar que o personal responsable da manipulación dos produtos da pesca estea formado é requisito indispensable para todas as entidades certificadas ou en proceso de certificación polo selo pescadeRías, ¿de onde se non? e así se reflicte nos correspondentes plans de formación. A certificación dos produtos garante, ademais da súa procedencia da pesca artesanal, que contan con todas as garantías hixiénicas e sanitarias para o seu consumo de xeito seguro, así como que cumpren con todos os requisitos esixidos pola lexislación vixente.

Convocados procesos selectivos para o acceso ao permiso de explotación na modalidade de marisqueo a pé para o exercicio da actividade extractiva na “Asociación de Mariscadoras Fonte Santa Helena” de Baldaio e na Confraría de Pescadores de Vilaxoán.

Convocado proceso selectivo para o outorgamento da modalidade de ourizo na modalidade de embarcación con técnicas de mergullo, para o plan conxunto das Confrarías de Pescadores de Espasante e O Barqueiro e para o outorgamento da modalidade de percebe a flote, da Confraría de Pescadores de Espasante.

Podes atopar toda a información relacionada premendo aquí.

En Santiago de Compostela, a barra gastronómica Lume by Lucía Freitas, ubicada a carón da praza de abastos, ofrece unha cociña informal en dous formatos, menú degustación onde os produtos da marca están moi presentes e unha cociña máis rápida na súa terraza.

Nas Rías Baixas, en A Casa de Rosa de Mazaroca (San Adrián de Cobres, Vilaboa), poderedes degustar as súas propias receitas de cociña tradicional baseada no produto.  En O Pescador (Portonovo), onde están moi presentes os produtos do mar, poderedes degustar os mellores peixes e mariscos desfrutando ao mesmo tempo das vistas ao seu porto.

Coa apertura e adhesión á marca dun novo local no Mercado Municipal Quiroga Ballesteros, en Lugo, xa son tres os establecementos que Da Lonxa ao Prato ten adheridos ao selo pescadeRías, ¿de onde se non?.

Nas súas peixerías de Lugo, Monforte de Lemos e A Pobra do Caramiñal, a empresa distribuidora de peixe e mariscos Da Lonxa ao Prato, cuxa depuradora de moluscos bivalvos está certificada pola marca pescadeRías, ¿de onde se non?, pon a disposición da súa clientela, peixes e mariscos da pesca artesanal, procedentes de lonxas galegas.

Durante o mes de xuño, a Confraría de Pescadores de “Pedra da Oliveira” (bivalvos) recertificouse no selo pescadeRías, ampliando o seu alcance de certificación á comercialización de cefalópodos. Tamén se recertificaron no selo a Confraría de Pescadores de Moaña (bivalvos), a Lonxa de Campelo AIE (bivalvos, cefalópodos, crustáceos e peixes) e a Confraría de Pescadores A Pastoriza de Vilanova de Arousa (bivalvos, crustáceos e algas). Por outra banda, as empresas distribuidoras e transformadoras Frigorífica Botana, S.L. (peixes) e Mares de Galicia S.A. (bivalvos, crustáceos, equinodermos e gasterópodos), superaron auditorías de seguemento da marca.

Axudas destinadas a compensar as empresas de transformación dos produtos pesqueiros e da acuicultura que tivesen perdas de produción entre o 1 de febreiro e o 31 de decembro de 2020, como consecuencia do brote de Covid-19. Prazo 28/07/21.

Axudas para proxectos colectivos que contribúan á protección e recuperación da biodiversidade mariña a través dunha mellor xestión e conservación dos recursos mariños e dos seus ecosistemas, así como ao fomento da sensibilización ambiental. Prazo 28/07/21.

Axudas autonómicas para proxectos colectivos destinados a investimentos en portos pesqueiros, lonxas e lugares de desembarque, que faciliten o cumprimento da obriga de desembarque das capturas e o incremento do valor dos compoñentes infrautilizados das capturas. Prazo 08/07/21.

A economía circular baséase na evolución do concepto tradicional das 3 R (reducir, reutilizar e reciclar) a un sistema multi- R (repensar, redeseñar, redistribuír, recuperar, reparar…) buscando un ciclo de utilización continuo dos recursos.

O consumo tradicional da vieira permitiu explorar unha infinidade de aplicacións:  Instrumento musical, cinceiro, envase para cociñar, enmenda ao solo, utensilio para beber ou material de construción.

Se se compara o seu contido proteico e pegada de carbono con diferentes grupos de alimentos, a vieira atópase situada entre aqueles que achegan unha maior cantidade de proteína pero cunha menor pegada de carbono. Preme aquí para ver o artigo de Gumersindo Feijoó, catedrático de enxeñería química na Universidade de Santiago de Compostela.

 

O sargo é un peixe semigraxo, frecuente na nosa pesca artesanal, moi saboroso e que podemos atopar con facilidade na nosa peixería de confianza.  Ademais das proteínas de boa calidade que nos aporta, contén selenio,  que fortalece o sistema inmune e combate o envellecemento, así como vitaminas do complexo B.

Ignacio Cancela, chef do Restaurante San Francisco, situado no corazón da vila mariñeira de Malpica de Bergantiños e adherido recentemente ao selo pescadeRías, ¿de onde se non?, amósanos como preparalo ao forno, de xeito sinxelo, acompañado de produtos da horta de tempada.

Unha receita lixeira,  nutritiva e chea de sabores a mar e terra. Podes consultala premendo aquí.