Sorteo de verán

Queremos celebrar a chegada do verán sorteando entre os/as nosos/as seguidores/as de facebook un vale por valor de 100 € para xantar ou cear nun restaurante adherido ao selo pescadeRías, ¿de onde se non?.

Para participar, entra na publicación do sorteo que aparecerá na nosa páxina de facebook, preme gústame e comenta cal é o teu produto do mar favorito. O sorteo terá lugar o vindeiro 21 xuño, preme aquí para ver as bases. Anímate a participar! Se queres coñecer cales son os nosos restaurantes adheridos preme aquí.


Contido en graxa dos peixes

Existe unha clasificación do peixe relacionada co seu contido en graxa: azul ou graxo, semigraxo e branco ou magro. Este contido varía segundo a época do ano e factores intrínsecos ao peixe (idade, sexo, alimentación, época de reprodución, etc).

Considéranse peixes graxos, aqueles cunha proporción de graxa superior ao 10%, semigraxos cando o contido está entre o 5 e o 10% e magros cando é inferior ao 5%. Lembra que a graxa do peixe está composta por ácidos graxos insaturados omega3, tan importantes para a saúde.

Charlas en escolas de hostalaría

O día 10 de maio impartíronse dúas charlas informativas sobre a marca pescadeRías, ¿de onde se non?, ao alumnado de primeiro do Ciclo Superior de Dirección de Cociña e de primeiro do Ciclo Medio de Cociña e Gastronomía do CIFP Manuel Antonio. Nas charlas déronse a coñecer diferentes aspectos da marca, o etiquetado e trazabilidade dos produtos do mar, seguridade alimentaria e a ecoetiqueta pescaenverde. Completouse a formación co recoñecemento de diferentes especies de moluscos bivalvos.

Moitas grazas a todos/as pola vosa participación!

Especies de tempada: Agulla

A agulla (Belone belone) é un peixe azul, de corpo alongado e estreito, de cor verdosa con brillos prateados na zona do lombo. As súas mandíbulas, armadas con dentes afiados, rematan en punta, de aí o seu nome, e miden case o dobre que a súa cabeza. A espiña e as escamas teñen tonalidades azuis verdosas moi características. Posúe unha carne compacta moi saborosa que pode acoller diferentes preparacións na cociña: fritida, afumada, guisada con patacas ou pasta, en empanada, tostas ou ensaladas. Tamén en escabeche e á prancha. Aproveita para degustala nesta tempada. Se queres saber máis sobre esta especie, preme aquí para ver unha ficha.

Proxecto 1 Mar de Alosas

A alosa é un peixe de dorso escuro e ventre prateado que posúe unha característica mancha escura detrás da abertura branquial seguida dunhas manchas máis pequenas (menos de 3 na zamborca e entre 5 e 8 na alosa). Forma bancos e realiza importantes migracións. Habita no mar en augas profundas e remonta os ríos para realizar a posta. A Confraría de Pescadores de Malpica participa no proxecto «1 Mar de Alosas» cuxo obxectivo é avaliar as capturas incidentais de Alosa alosa (Zamborca) e Alosa fallax (Alosa) pola flota costeira galega e propor medidas de xestión e conservación así como a posta en valor destas especies.

Especies pescadeRías: Dourada

A dourada (Sparus aurata) ten o corpo alto e comprimido, de cor gris prateada, cunha mancha dourada entre os ollos, que desaparece cando morre, e unhas manchas negras por detrás da cabeza. Os beizos son grosos e carnosos. Pode chegar aos 70 centímetros. Vive en augas pouco profundas (menos de 30 metros) en fondos de area ou pedra. É un peixe de augas cálidas que escasea nas nosas costas. Cando se pesca faise con trasmallo e tamén con palangre.

Se queres coñecer os seus principais valores nutricionais, preme aquí para ver unha ficha desta especie.

Accións formativas

No mes de maio, tripulantes das embarcacións que traballan ao choco da Confraría de Vilaboa recibiron formación en Hixiene e Manipulación de alimentos. Tamén recibiu formación nestas materias o persoal de lonxa e de mantemento do Porto de Celeiro. Acreditar que o personal responsable da manipulación estea formado é requisito indispensable para todas as entidades certificadas ou en proceso de certificación polo selo pescadeRías, ¿de onde se non?.

Novos plans de xestión

A primeiros do pasado mes, publicáronse as resolucións polas que se aproban novos plan de xestión de marisqueo de nova incorporación para a conservación e explotación de recursos específicos presentados polas confrarías de pescadores de Corme (algas con técnicas de mergullo), Lira (anémones na modalidade a pé), Corcubión (anémones na modalidade a pé) e Malpica (ourizo na modalidade a pé).

Percebeiros das Cíes na TVE

O Programa España Directo da TVE estivo a gravar aos percebeiros da Confraría de Pescadores de Cangas traballando na cara máis escarpada das Illas Cíes. Podes ver a reportaxe premendo aquí, as imaxes son certamente impresionantes!

O percebe colleitado nas Illas Cíes é comercializado na Lonxa de Cangas e está certificado polo selo pescadeRías, ¿de onde se non?.

Participación en feiras 2021

A Consellería do Mar da Xunta de Galicia, a través da Dirección Xeral de Pesca, Acuicultura e Innovación Tecnolóxica, e dentro das súas actuacións de promoción do sector pesqueiro, prepara a programación para asistir a diferentes feiras de ámbito internacional e nacional durante o ano 2021. Se tes interese en participar, podes atopar toda a información premendo aquí.

Nova peixería adherida

Da Lonxa ao Prato abriu as portas dun novo local na Praza de Abastos de Monforte de Lemos (Lugo) adherida recentemente ao selo pescadeRías, ¿de onde se non?, o mesmo que a súa peixería en A Pobra do Caramiñal.

Nos seus establecementos, pon a disposición da súa clientela, peixes e mariscos da pesca artesanal, procedentes de lonxas galegas.

Recertificacións e seguementos

Durante o mes de maio, a depuradora Mariscos Malliño, S.L., renovou a súa certificación (bivalvos) no selo pescadeRías, ¿de onde se non?.

Por outra banda, a Lonxa de Marisco de Vigo (bivalvos), a Lonxa de Sada (peixe e cefalópodos) e a depuradora Mariscos Camino, S.L. (bivalvos), superaron auditorías de seguemento da marca.

Convocatoria de PERMEX

Convocados procesos selectivos para o acceso ao permiso de explotación, modalidade anémones a pé, para o exercicio da actividade extractiva nas Confrarías de Pescadores de Corcubión e Lira.

Podes atopar a información relacionada con ambas convocatorias na sección de anuncios do portal da Consellería do Mar. Accede premendo aquí.

Proxecto COCKLES

En 2017 iníciase o proxecto europeo “COCKLES-Cooperación para a recuperación das pesqueiras do berberecho e os seus servizos ambientais na área Atlántica” co obxectivo de recuperar os  stocks naturais e aumentar a súa produción. Foi co-financiado polo programa Interreg Atlantic Area, e o CETMAR coordinou o traballo desenvolvido polas 22 organizacións do consorcio. Premendo aquí atoparás un artigo no que se explica o proxecto así como os seus principais resultados.

A receita do mes

Chega a calor e con ela as comidas ao aire libre nas que unha empanada sempre é un valioso recurso.

Rogelio Santos, mariñeiro da Confraría de Pescadores de Porto do Son, amósanos como preparala de millo e peixe (doncelas, choupa e pescada) conforme a receita da súa nai Carmen Queiruga Calo. Mil grazas por compartila!

Preme aquí para acceder a ela.